نیشنل لیبر فیڈریشن پاکستان کے نائب صدر ظفر خان نے مختلف اداروں کے ملازمین سے گفتگو کرتے ہوئے کہا ہے کہ موجودہ حکمران قومی اداروں کی بحالی اور بہتری اور منافع بخش بنانے کے نعرے اور وعدے پر اقتدار میں آئے ہیں اور یہ خود ان کے منشور کے برعکس ہے کہ وہ اداروں کی بحالی کے بجائے آئی ایم ایف اور غیر ملکی ساہوکاروں کے دبائو اور ایجنڈے پر عملدرآمد کرتے ہوئے قومی اداروں ریلوے، پی آئی اے، پاکستان اسٹیل سے ملازمین کو جبری برطرف کریں اور انہیں سیاسی بھرتیوں کا رنگ دینے کی کوشش کریں۔ پہلے ہی کورونا اور لاک ڈائون کی وجہ سے ملک میں بیروزگاری میں بے پناہ اضافہ ہورہا ہے۔ لہٰذا اگر ایک کروڑ نوکریاں دینے کا وعدہ پورا نہیں کیا جارہا تو پبلک، پرائیویٹ اور دیگر اداروں سے ملازمین اور مزدوروں کو بیروزگار بھی نہ کیاجائے۔