وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ اگرچہ صحافی ولی خان بابر کا اصل قاتل تو لندن میں بیٹھا ہے لیکن آلہ کار کی گرفتاری نے یاد کرایا کہ کراچی پر کیسا مافیا راج کرتا تھا۔
وفاقی وزیر فواد چوہدری نے 13 جنوری 2011 کو قتل کیے گئے صحافی والی خان بابر کے حوالے سے ٹوئٹ کیا کہ آج کا کراچی اس جبر کے شکار کراچی کے مقابلے میں جنت ہے۔
انہوں نے کہا کہ کراچی نے بہت لہو دیکھا ہے برطانیہ کو پاکستان کے مجرم حوالے کرنے چاہئیں تا کہ اصل شیطان انجام کو پہنچیں۔
اگرچہ ولی خان بابر کا اصل قاتل تو لندن بیٹھا ہے لیکن آلہ کار کی گرفتاری نے یاد کرایا کہ کراچی پر کیسا مافیا راج کرتا تھا، آج کا کراچی اس جبر کے شکار کراچی کے مقابلے میں جنت ہے، کراچی نے بہت لہو دیکھا ہے برطانیہ کو پاکستان کےمجرم حوالے کرنے چاہئیں تا کہ اصل شیطان انجام کو پہنچیں
— Ch Fawad Hussain (@fawadchaudhry) June 16, 2020
خیال رہے کہ گزشتہ روز صوبائی وزیر اطلاعات ناصر حسین شاہ اور کراچی پولیس چیف غلام نبی میمن نے پیریس کانفرنس میں بتایا کہ صحافی ولی خان بابر پر گولی چلانے والے قاتل کو گرفتار کرلیا گیا ہے۔
کراچی پولیس چیف کا کہنا ہے کہ ولی بابر پر براہ راست گولی چلانے والا کامران تھا، صحافی کے قتل کا ماسٹر مائنڈ فیصل موٹا تھا، قاتل نے بتایا ولی بابر کو مارنے کی وجہ اے این پی کے لیے کام کرنا تھا اور ایم کیو ایم مخالف اسٹوری پر کام کررہا تھا، ملزمان کو ایم کیو ایم جنوبی افریقا سے بھی ہدایت ملتی تھیں، ملزم کاتعلق ایم کیو ایم لندن سے ہے۔
