پولیس نے سنتھیا رچی کے خلاف مقدمہ درج کرنے سے معذرت کرلی

523

اسلام آباد پولیس نے امریکی صحافی سینتھیا رچی کی جانب سے بے نظیر بھٹو پر الزامات عائد کرنے پر مقدمہ درج کرنے سے معذرت کرلی۔

سیشن کورٹ اسلام آباد میں ایڈیشنل سیشن جج زیبا چودھری نے پیپلز پارٹی کارکن وقاص عباسی کی درخواست پر سماعت کی۔

درخواست میں موقف اختیار کیا گیا کہ بینظیر بھٹو پر الزامات عائد کر کے سینتھیا رچی نے قابل دست اندازی جرم کیا، پولیس کو درخواست دی لیکن مقدمہ درج نہیں کیا جا رہا۔

عدالتی نوٹس پر تھانہ بنی گالا پولیس کے حکام پیش ہوئے اور عدالت کو بتایا کہ یہ سوشل میڈیا پر الزام لگایا گیا اور ایف آئی اے کا کیس بنتا ہے ہمارے دائرہ اختیار میں نہیں کہ سوشل میڈیا کے معاملہ پر مقدمہ درج کریں۔

اسلام آباد پولیس نے سینتھیا ڈی رچی کیخلاف مقدمہ ایف آئی اے کا اختیار قرار دے دیا۔

درخواست گزار کے وکیل نے عدالت کو بتایا کہ ہماری درخواست پر تعزیرات پاکستان کی دفعات بنتی ہے، پولیس مقدمہ درج کر سکتی ہے صرف بہانہ بنا رہی ہے، دفعہ 500اور 505کے تحت پولیس کو مقدمہ درج کرنیکا اختیار ہے۔

ایڈیشنل سیشن جج زیبا چوہدری نے پولیس سے تفصیلی جواب طلب کرتے ہوئے کیس کی سماعت 17جون تک ملتوی کر دی۔