پی ایس او نے ہائی اوکٹین کی قیمت 15روپے فی لیٹر کم کردی

105

اسلام آباد (آئی این پی) پاکستان اسٹیٹ آئل (پی ایس او)نے ہائی اوکٹین کی قیمت میں 15روپے فی لیٹر کم کر دی۔ اب ایچ او بی سی کی قیمت 142روپے فی لیٹر مقرر ہوگی۔ایچ او بی سی پہلے 157روپے فی لیٹر فروخت کیا جا رہا تھا۔ڈی ریگولیٹ ہونے کی وجہ سے آئل اینڈ ریگولیٹری اتھارٹی (اوگرا)کو ایچ او بی سی کی قیمت تعین کرنے کا اختیار نہیں تھا۔ جمعرات کو معاون خصوصی برائے پیٹرولیم ندیم بابر نے نجی ٹی وی سے گفتگو میں کہاکہ ہمارے ایچ او بی سی اور فیول آئل ریگیولیٹڈ نہیں ہیں۔قانونی طور پر اوگرا یا وزارت خزانہ ایچ او بی سی کی قیمت متعین نہیں کر سکتیں۔ ندیم بابر کا کہنا تھا کہ ہائی اوکٹین پیٹرول کی ضرورت سے زیادہ قیمت کی تحقیقات کے لیے اوگرا کو لکھا ہے۔ قانونی طور پر قیمت کو دیکھنا ریگیولیٹر کا کام ہے۔ایک سوال کا جواب دیتے ہوئے ان کا کہنا تھا کہ پیٹرولیم مصنوعات کی قیمت کے طے کرنے کے طریقہ کار میں اصلاحات کی جائیں گی۔ بین الاقوامی مارکیٹ میں تیل کی قیمت میں کمی کی وجہ سے آئل کمپنیوں اور ریفائنریز کو نقصان ہوا، اپنے نقصان کو پورا کرنے کے لیے اب آئل کمپنیز ضرورت سے زیادہ منافع کمانا چاہ رہی ہیں۔ ان کا کہنا تھا کہ آئل کمپنیز کو قیمتوں میں کمی کی وجہ سے اگر انونٹری پر نقصان ہوا ہے تو قیمتیں بڑھنے پر فائدہ بھی ہوگا۔ بظاہر یہ صاف لگ رہا ہے کہ ہائی اوکٹین پیٹرول کی قیمت میں کمی آنا چاہیے تھی جو کہ نہیں آئی۔ معاون خصوصی نے کہا کہ ہمارا قیمتیں طے کرنے کا نظام قیمتوں کے غیر مستحکم ماحول میں ناکام ہو جاتا ہے۔ ہم اپنے 15 سال پرانے قیمت طے کرنے کے نظام کو ہی تبدیل کرنے جا رہے ہیں۔ندیم بابر نے کا کہنا تھاکہ آئل کی درآمد پر تین ہفتے بعد پابندی اٹھا لی گئی تھی۔ آئل کمپنیز نے قیمتوں میں مسلسل کمی کو دیکھتے ہوئے تیل درآمد نہیں کیا۔انہوں نے کہا کہ آئل کمپنیز سے اگلے دو اور ریفائنریز سے تین مہینوں کا درآمد سے متعلق پلان مانگا ہے۔ آئل کمپنیز کو تیل ذخیرہ کرنے سے متعلق لائسنس کی شرائط پر عملدرآمد کرنا ہوگا۔