اسلام آباد (جسارت نیوز) پاکستان جوڈو فیڈریشن قومی کھلاڑیوں کی کارکردگی میں بہتری لانے کے لیے آن لائن مقابلے شروع کرے گی جس میں جاپان سے قومی کھلاڑی شاہ حسین شاہ اور آمنہ طیاڈا بھی شرکت کریں گے۔ پاکستان جوڈو فیڈریشن کے نائب صدر اور ڈائریکٹر میڈیا مسعود احمد خان نے سرکاری خبر رساں ادارے کو بتایا کہ فیڈریشن آن لائن 2 جوڈو کے مقابلے شروع کرے گی جس میں فٹنس پروگرام اور کاتا کے مقابلے شامل ہیں۔ انہوں نے کہا کہ آن لائن مقابلوں میں فیڈریشن سے منسلک 14 یونٹس کے کھلاڑی شرکت کریں گے۔ فیڈریشن نے تمام یونٹس کو ہدایت جاری کر دی ہے کہ ہر یونٹ کھلاڑیوں کی آن لائن مقابلوں میں شرکت کو یقینی بنائے۔ انہوں نے کہا کہ آن لائن مقابلوں میں جاپان سے شاہ حسین شاہ اور آمنہ طیاڈا بھی شرکت کریں گے۔ انہوں نے کہا کہ آن لائن مقابلے مستقبل میں کھلاڑیوں کے لئے مدد گار ثابت ہوں گے۔
