قومی کرکٹرز ٹریننگ کے آغاز پر کوچز سے محرومی کا شکار

کراچی (اسٹاف رپورٹر) قومی کرکٹ ٹیم کے کھلاڑی انگلینڈ ٹور سے قبل جون میں شروع ہونیوالی ٹریننگ کے دوران اپنے کوچز سے محرومی کا شکار رہیں گے کیونکہ کوچنگ اسٹاف میں شامل وقار یونس،کلف ڈیکن اور گرانٹ بریڈبرن فی الوقت پاکستان میں موجود نہیں ہیں۔ذرائع کا دعویٰ ہے کہ بولنگ کوچ وقار یونس پاکستان سپر لیگ کا5واں ایڈیشن کورونا وائرس کے سبب ملتوی ہونے کے فوری بعد آسٹریلیا جب کہ فزیو کلف ڈیکن جنوبی افریقاروانہ ہو گئے تھے جن کی سفری پابندیوں کے باعث واپسی ممکن نہیں ہو سکی۔ذرائع کا کہنا ہے کہ قومی ٹیم کے فیلڈنگ کوچ گرانٹ بریڈبرن بھی پاکستان سپر لیگ سے قبل چھٹیوں پر اپنے وطن نیوزی لینڈ واپس جا چکے ہیں اور تینوں کوچز قومی کرکٹ ٹیم کی مرحلہ وار ٹریننگ کے ابتدائی حصے میں دستیاب نہیں ہوں گے جبکہ سفری پابندیاں ختم نہ ہوئیں تو انہیں ٹریننگ کیمپ کی نگرانی سے بھی محروم رہنا ہوگا۔چیف ایگزیکٹو پی سی بی وسیم خان واضح کر چکے ہیں کہ وقار یونس پاکستان واپس نہ آسکے تو وہ براہ راست انگلینڈ پہنچ کر ٹیم جوائن کریں گے جب کہ دیگر دونوں کوچز سے ہیڈ کوچ مصباح الحق کا مسلسل رابطہ ہے جن سے ٹریننگ پلان کے حوالے سے مشاورت کی جا رہی ہے اور کوشش یہی ہے کہ انہیں جلد پاکستان بلایا جا سکے۔