کھلاڑی آئی پی ایل کی وجہ سے کوہلی کو کچھ کہنے سے ڈرتے ہیں،مائیکل کلارک

197

سڈنی (جسارت نیوز) آسٹریلیا کے سابق کپتان مائیکل کلارک نے بھارتی کرکٹ بورڈ اور آئی پی ایل کیخلاف ایک اور پینڈورا باکس کھول دیا ہے۔ انہوں نے دعویٰ کیا کہ آسٹریلوی کھلاڑی آئی پی ایل کی وجہ سے بھارتی کپتان ویرات کوہلی کو میدان میں کچھ کہنے سے ڈرتے ہیں۔ ان کا کہنا تھا کہ آسٹریلوی کھلاڑیوں کو ڈر ہوتا ہے کہ ان سے آئی پی ایل کے مہنگے کنٹریکٹ واپس لے لیے جائیں گے کیوں کہ ہم سب جانتے ہیں کہ بھارتی کرکٹ بورڈ کے پاس کتنا پیسہ ہے اور اس وہ کتنا طاقت ور ہے۔سینئر پاکستانی اسپورٹس تجزیہ کار مرزا اقبال بیگ نے نجی ٹیلی ویژن سے بات کرتے ہوئے بتایا کہ پیسے میں بہت طاقت ہے اور کھلاڑی لاکھوں ڈالر لینے کیلئے آئی پی ایل کھیلتے ہیں۔اقبال بیگ کا کہنا تھا پی ایس ایل کے پانچوں سیزن پاکستان میں نہیں ہوئے لیکن پھر بھی اس کو کافی کامیابی ملی ہے۔ سابق کرکٹر عاقب جاوید نے کہا یہ حقیقت ہے کہ وقت تبدیل ہوتا رہتا ہے۔آئی پی ایل کے بعد بھارتی کرکٹ بورڈ بہت طاقت ور ہو گیا ہے۔ انہوں نے کہا کہ کرکٹرز کیلئے لیگز میں زیادہ پیسہ ہے۔ اگر پی ایس ایل کے پانچ ایڈیشن پاکستان میں ہوتے اور یہاں کے حالات بہتر ہوتے تو یہ بھی دوسری بڑی لیگ بن سکتی تھی۔ ان کا کہنا تھا کہ کرکٹ لیگز میں بہت پوٹینشل ہے پاکستان کو بھی چاہیے کہ پی ایس ایل کر مضبوط کرے۔