وزیر خارجہ شاہ محمود قریشی کا کہنا ہے کہ حکومت دنیا بھر مںں ائیر پورٹس پر پھنسے پاکستانیوں کو وطن واپس لانے کی ہر ممکن کوشش کررہے ہیں۔
اسلام آباد میں وزارت خارجہ میں قائم کرائسز مینجمنٹ سیل کے اچانک دورے میں گفتگو کرتے ہوئے شاہ محمود قریشی نے کہا کہ ہمیں بحیثیت قوم، مل کر اس وبائی چیلنج سے نبرد آزما ہونا ہے یہ پوری قوم کیلئے کڑے امتحان کا وقت ہے۔
وزیر خارجہ نے کہا کہ جذبہ ایمانی کے ساتھ اس وبائی عفریت کو شکست دیں گے۔
وزیر خارجہ نے ایمرجنسی کرائسز مینجمنٹ سیل کے مختلف سیکشنز کا معائنہ کیا۔
ڈی جی کرائسز مینجمنٹ سیل سلمان اطہر نے سیل کی کارکردگی کے حوالے سے وزیر خارجہ کو بریفنگ دی۔ وزیر خارجہ نے ایمرجینسی کرائسز مینجمنٹ سیل میں موصول ہونے والی شکایات کا بھی جائزہ لیا۔
وزیر خارجہ نے ایمرجنسی کرایسز مینجمنٹ سیل کی کارکردگی پر اطمینان کا اظہار کرتے ہوئے سیل میں ڈیوٹی سر انجام دینے والے افسران اور عملے کی کاوشوں کو سراہا۔