کراچی: سندھ حکومت نے صوبے میں کورونا وائرس کے پھیلاؤ کے خطرے کے پیش نظر نماز جمعہ کے اجتماعات پر پابندی عائد کردی ہے۔
صوبائی وزیر اطلاعات ناصر حسین شاہ کے مطابق صوبے بھر کی مساجد میں 27 مارچ سے 5 اپریل تک نماز جمعہ کے اجتماعات کی اجازت نہیں ہوگی جبکہ مساجد کھلی رہیں گی اور اذانیں بھی ہوں گی۔
سندھ حکومت کے ترجمان مرتضیٰ وہاب نے ٹوئٹ کرتے ہوئے کہا ہے کہ نماز جمعہ کے اجتماعات پر پابندی کا فیصلہ تمام مکاتب فکر کے علماء کرام اور طبی ماہرین کی مشاورت سے کیا گیا ہے، مساجد میں عملے سمیت پانچ افراد کے باجماعت نماز ادا کرنے کی اجازت ہوگی۔
انہوں نے مزید کہا ہےکہ پابندی کی خلاف ورزی کرنے والے کو گرفتار کرلیں گے۔
کورونا وائرس کے پھیلاؤ کو روکنے کے لئے حکومت سندھ کا بڑا فیصلہ، مساجد میں عام افراد باجماعت نماز ادا نہیں کرسکیں گے، فیصلہ تمام مکاتب فکر کے علمائے اکرام اور طبی ماہرین کی مشاورت کے بعد کیا گیا ہے۔ مسجد کے عملے سمیت پانچ افراد باجماعت نماز پڑھ سکیں گے۔شہری فیصلے کی پابندی کریں۔
— Murtaza Wahab Siddiqui (@murtazawahab1) March 26, 2020
مرتضیٰ وہاب کے مطابق فیصلے کا اطلاق کل صبح سے ہوگا۔
