کورونا وائرس کی تباہ کاریاں جاری ہیں ، دنیا بھر میں ہلاکتوں کی تعداد 16 ہزار 558 تک پہنچ چکی ہے،کورونا سے متاثرہ افراد کی تعداد 3 لاکھ 81ہزار761 سے تجاوز کر گئی جبکہ1 لاکھ 2 ہزار 429 افراد صحتیاب ہوچکے ہیں ۔
سعودی عرب سمیت دیگر ممالک بھی کورونا کے پھیلاؤ کو روکنے کیلے سرگرم ہیں ، شاہ سلمان نے کورونا وائرس کے پھیلاؤ کو کنٹرول کرنے کیلئے سعودی عرب میں روزانہ شام7 سے صبح 6 بجے تک 21 روز کیلئے ملک بھر میں جزوی کرفیو نافذ کرنے کا حکم جاری کردیا ہے۔
امریکا میں کورونا وائرس کے وار جاری ہیں ،غیر ملکی خبر رساں ایجنسی نے دعویٰ کیا ہے کہ امریکا میں مارشل لا پر غور کیا جا ر ہا ہے، اگر سیاسی قیادت بھی کورونا وائر س کا شکار ہوئی تو امریکا میں مارشل لا لگایا جا سکتا ہے۔
دوسری جانب کورونا وائرس کے باعث گزشتہ 24 گھنٹے کے دوران سب سے زیادہ ہلاکتیں اٹلی میں ریکارڈ کی گئیں،جہاں مزید 651 ہلاکتوں سے مجموعی تعداد 6 ہزار 77 ہوگئی ہے۔اسپین میں 2 ہزار 311، ہالینڈ میں213 افراد جان کی بازی ہار گئے۔
چین سے پھیلنے والے کورونا وائرس نے چین میں مزید 7 افراد کی جان لے لی، جہاںمرنے والوں کی تعداد 3277 ہوگئی ہے ،ایران میں 1812،برطانیہ میں 335 اور فرانس میں 860 افراد ہلاک ہوگئے ہیں۔
جنوبی کوریا میں 120، جرمنی میں ہلاکتوں کی تعداد 123 ہو گئی ہے جبکہ بھارت میں کورونا سے10 افراد ہلاک اور 511 افراد متاثرہیں۔سعودی عرب میں کورونا مریضوں کی تعداد بڑھ کر 562 ہوگئی ہے۔امریکا میں کورونا سے ایک روز میں 29 افراد ہلاک ہوئے اور مرنے والوں کی تعداد 582 ہو گئی ہے۔
امریکی صدر نے نیو یارک اورکیلی فورنیا کو آفت زدہ علاقہ قرار دے دیا ہے، ٹرمپ کا کہنا ہے کہ کورونا ایک مشکل اور پیچیدہ دشمن ہے،اس کے خلاف جنگ میں جلد فتح حاصل کریں گے۔ کورونا وبا ظاہر ہوتے وقت چین کو ہمیں مطلع کرناچاہیے تھا۔
ایرانی سپریم لیڈر آیت اللہ خامنہ ای نے کہا ہے کہ کورونا سے متعلق امریکی مدد پر بھروسہ نہیں، ہم کورونا وائرس سمیت ہر قسم کے بحران پر قابو پا سکتے ہیں ۔آیت اللہ خامنہ ای نے شک کا اظہار کرتے ہوئے کہا کہ شبہ ہے کہ وائرس امریکا نے تخلیق کیا۔
مصر میں کورونا وائرس سے متاثر ہونے والے مسلح افواج کے میجر جنرل خالد شلتوت چل بسے ہیں۔مصری میڈیا کے مطابق میجر جنرل خالد شلتوت کی کورونا سے ہلاکت کے باعث فوج میں صدمے اور سوگ کی کیفیت ہے۔
فلسطین کے علاقے غزہ میں حکام نے کورونا وائرس کے 59 کیسز کی تصدیق کردی،حکام کے مطابق کچھ فلسطینیوں نے پاکستان کا سفر کیا تھا اور واپس لوٹنے پر انہیں قرنطینہ میں رکھا گیا تھا۔
کورونا وائرس کے تیزی سے پھیلاؤ سے برطانوی شاہی خاندان بھی مسائل سے دوچار ہے، جس کے بعد اس بات کے امکانات زیادہ ہوگئے ہیں کہ جلد ہی عارضی طور پر شہزادہ ولیم بادشاہت کے فرائض سر انجام دیں گے۔