ملک کے مختلف حصوں میں آج سے بارش کا امکان ہے جب کہ شہر کراچی میں اتوار سے منگل تک بارش کی پیش گوئی کی گئی ہے۔
محکمہ موسمیات کا کہنا ہے کہ ملک کے بالائی حصوں سمیت پنجاب، خیبرپختونخوا اور بلوچستان کے بعض شہروں میں آج سے بارش کا سلسلہ شروع ہو جائے گا۔
ڈائریکٹر محکمہ موسمیات سردار سرفراز کے مطابق شہرقائد میں بھی بارش کا امکان ہے، مغربی ہواؤں کے سسٹم کے باعث کل رات سے بونداباندی یا ہلکی بارش شروع ہوگی۔
سردار سرفراز کا کہنا ہے کہ ہلکی بارش کا سلسلہ دو روز تک برقر ار رہ سکتا ہے، 23 اور 24 مارچ تک موسم معتدل رہے گا اور دو روز کے دوران 10 سے 12 ملی میٹر تک بارش ہو سکتی ہے۔
محکمہ موسمیات کا کہنا ہے کہ ہفتہ کو شہر میں موسم ابر آلود رہنے کا امکان ہے جس سے گرمی کا زور ٹوٹ جائے گا اور اتور کو بھی گہرے بادل چھائے رہیں گے۔