ہرکولیس جہاز کو پورٹ سے ہٹانے کوشش ناکام، انسانی زندگیوں کیلئے خطرہ برقرار

157

کراچی(اسٹاف رپورٹر)امریکہ سے آ یاسویا بین سے لدے ہرکو لیس جہاز کو پورٹ سے ہٹانے میں تاخیر کے باعث انسانی زندگیوں کیلئے خطرہ برقرار ہے، کپتان نے بیلنس نہ ہونے پر جہاز لے جانے سے منع کردیا، جہازکواب کل پورٹ قاسم منتقل کیاجائیگا،

تفصیلات کے مطابق کیماڑی کی فضاء کو زہرآلود کرنے والے سویا بین سے لدے ہرکولیس جہاز کو اب تک پورٹ سے ہٹایانہ جاسکا، ہرکولیس جہازکو پورٹ قاسم منتقل کرنے کی تیسری کوشش بھی ناکام ہوگئی، کپتان نے بیلنس نہ ہونے پر جہاز لے جانے سے منع کردیا ہے،

جہاز کی منتقلی کے لیے ٹگ بورڈ کے کپتان کی تیاری مکمل تھی لیکن ہرکولیس جہازکوبیلنس کرنیکاعمل مکمل نہیں ہوسکا، جہازکواب کل پورٹ قاسم منتقل کیاجائیگا،

خیال رہے جہاز کو پہلے صبح گیارہ بجے منتقل کرنیکافیصلہ ہواتھا تاہم انتظامیہ کا کہنا تھا کہ سمندرمیں لہروں کومدنظررکھتے ہوئے جہاز کو پورٹ قاسم منتقل کردیا جائے گا،

کراچی چیمبر آف کامرس کے صدر آغا شہاب کا کہنا ہے کہ جہاز کی منتقلی مسئلے کا حل نہیں، سائنسی بنیادوں پر جامع تحقیقات کا آغاز کرکے ذمے داروں کو سخت سزا دی جائے، پچیس سال سے سویا بین شپ منٹس کی آمدکے پی ٹی پر ہوتی ہے، کبھی کوئی واقعہ نہیں سنا گیا، کے پی ٹی کی سرگرمیوں میں کسی بھی قسم کے خلل سے معاشی سرگرمیوں پرانتہائی منفی اثرات پڑیں گے،

یاد رہے وفاقی وزیر علی زیدی کی زیر صدارت اجلاس میں حفاظتی اقدامات کے تحت سویابین لانے والے بحری جہاز ہرکولیس کو پورٹ قاسم منتقل کرنے اور باقی کارگو آف لوڈ کرنے کا فیصلہ کیا گیا تھا جبکہ کمشنر کراچی افتخار شالوانی کی سربراہی میں ایک کمیٹی بھی تشکیل دی گئی جو واقعے سے متعلق مزید تحقیقات کرے گی، یہ کمیٹی ماہرین اور تکنیکی افراد کی خدمات بھی لے سکے گی،

واضح رہے کہ شہر قائد کے علاقے کیماڑی میں زہریلی گیس سے 14 اموات دراصل سویابین لانے والے امریکی جہاز ہرکولیس سے گرد پھیلنے کی وجہ سے ہوئی ہیں، سویابین لانے والا ہرکولیس جہاز کراچی پورٹ پر لنگر انداز ہے۔