مسلمانوں کے خلاف نفرت عالمی امن کیلئے خطرہ ہے، ترجمان پاک فوج

416

راولپنڈی: ترجمان پاک فوج میجر جنرل آصف غفور نے ناروے میں قرآن پاک کی بے حرمتی روکنے والے نوجوان الیاس کو بہادری اور جرات دکھانے پرسلام پیش کیا ہے۔

تفصیلات کے مطابق ناروے میں چند روز قبل اسلام مخالف تنظیم (سیان) کے سربراہ ملعون لارس تھورسن نے قرآن پاک کی شدید بے حرمتی کرتے ہوئے نذر آتش کرنے کی کوشش کی۔ تاہم وہاں موجود مسلمان نوجوان اس بے حرمتی کو برداشت نہ کرسکے جبکہ اس دوران  ایک بہادر نوجوان عمر الیاس نے ملعون لارس تھورسن کو روکنےکیلئے اس پر حملہ کردیا۔

دنیا بھر کے مسلمان عمر الیاس کو قرآن کی بے حرمتی روکنے پر سراہ رہے ہیں  تو وہیں  ترجمان پاک فوج میجر جنرل آصف غفور نے بھی عمر الیاس کی ہمت و جرات کو سراہتے ہوئے کہا ہے کہ نوجوان الیاس کی جرات کوسلام جس نے ایک افسوسناک اور قابل مذمت کارروائی کو روکنے کیلئے ہمت کا مظاہرہ کیا۔

ترجمان پاک فوج نے کہا کہ ایسی اسلامیوفوبیا پر مبنی اشتعال انگیزی صرف نفرت اور انتہا پسندی کو فروغ دیتی ہے۔ تمام مذاہب قابل احترام ہیں۔ اسلاموفوبیا عالمی امن اور ہم آہنگی کیلئے خطرہ ہے۔

دوسری جانب سوشل میڈیا سمیت پاکستان اور ترکی نے اس اقدام کی سختی سے مذمت کرتے ہوئے کہا ہے کہ ملعون لارس تھورسن کو قرار واقعی سزا  دی جائے اور نوجوان الیاس کو فل الفور رہا کیا جائے۔

واضح رہے کہ ناروے کے شہر کرسٹین سینڈ میں مسلمانوں کی بڑی تعداد آباد ہے اس کے باوجود ناروے کی انتظامیہ نے نہ صرف  اشتعال انگیز ریلی کی اجازت دی بلکہ قرآن کی توہین سے بھی نہ روکا۔ واقعے کے بعد ناروے سمیت دنیا بھر کے مسلمانوں نے توہین قرآن کی شدید مذمت کرتے ہوئے معلون لارس تھورسن پر نفرت انگیز جرائم کا مقدمہ درج کرنے کا مطالبہ کیا ہے۔