وفاقی وزیر ریلوے شیخ رشید نے کہا ہے کہ وہ بہت پہلے سے کہہ رہے ہیں کہ نواز شریف ملک سے باہر چلے جائیں گے،قطر کی ائیر ایمبولینس ان کو لیجانے کیلئے تیار کھڑی ہے۔
وزیر ریلوے نے حکومت کی جانب سے نواز شریف کا نام ای سی ایل سے نکالنے کے فیصلےپر ردعمل دیتے ہوئے کہا کہ میں بہت پہلے سے کہہ رہا ہوں نواز شریف چلے جائیں گے، قطر والوں نے پچھلے منگل کو آنے کی اجازت مانگی تھی، قطر کی ایئر ایمبولینس ان کے لیے تیار کھڑی ہے۔
شیخ رشید نے کہا کہ نواز شریف سے کوئی پیسا نہیں نکلے گا، ملک کا لوٹا ہوا پیسا آصف زرداری کے دوستوں سے نکلے گا۔
انہوں نے کہا کہ انھیں ابھی معلوم نہیں کہ نواز شریف کب باہر جائیں گے،نواز شریف اور آصف زرداری کو فضل الرحمان کی دعائیں لگی ہیں، اللہ دونوں کو صحت دے، جہاں تک نواز شریف کے سیاسی بحران کے شکار ہونے کا سوال ہے تو اس کی وجہ مریم نواز ہے۔
