امریکا نے ایک بار پھر ابو بکر البغدادی کو ہلاک کرنے کا دعویٰ کردیا

213

امریکا نے دعویٰ کیا ہے کہ امریکی فوج نے شمالی شام میں کارروائی کرتے ہوئے داعش کے سربراہ ابو بکر البغدادی کو ہلاک کر دیا ہے۔

وائٹ ہاؤس کی جانب سے ایک بیان سامنے آیا ہے کہ اس حوالے سے صدر ڈونلڈ ٹرمپ آج اہم اعلان کریں گے۔ وائٹ ہاؤس کی جانب سے دیگر تفصیلات فراہم نہیں کی گئیں۔

جبکہ صدر ٹرمپ نے ایک پُراسرار ٹوئٹ کرتے ہوئے اشارہ دیا ہے کہ “کچھ بہت بڑا ہوا ہے”۔

دوسری جانب ایک امریکی حکام نے نام ظاہر نہ کرنے کی شرط پر غیر ملکی خبر رساں ایجنسی کو بتایا ہے کہ امریکی فوج کی جانب سے شام کے شمال میں ایک بڑی کارروائی کی گئی ہے جس میں ابو بکر البغدادی کی ہلاکت کی اطلاع ہے لیکن اس کی تصدیق کرنا ابھی باقی ہے۔

واضح رہے کہ اس پہلے بھی امریکا کی جانب سے داعش کے سربراہ کو ہلاک کرنے کی خبریں آتی رہی ہیں۔