شام میں ترکی کےفوجی آپریشن پر اقوام متحدہ کی سلامتی کونسل کاہنگامی اجلاس آج ہو رہاہے۔
غیر ملکی خبر رساں ادارے کے مطابق سیکیورٹی کونسل کا اجلاس آج ہوگا، ہنگامی اجلاس بیلجیئم،فرانس،برطانیہ،جرمنی اور پولینڈکی درخواست پرطلب کیاگیا ہے۔
اقوام متحدہ کی سلامتی کونسل کا اجلاس بند کمرے میں ہوگا اور اس اجلاس میں ترکی کی شام میں کارروائی کے معاملے پر غور کیا جائے گا۔
دوسری جانب ترکی کے فوجی آپریشن پر عرب لیگ کا بھی ہنگامی اجلاس طلب کرلیا گیا ہے، عرب لیگ کا اجلاس 12 اکتوبر کو بلایا گیا ہے۔
ترک صدر رجب طیب اِردوان نے شمال مشرقی شام میں محفوظ علاقے کے قیام اور دہشت گرد تنظیم داعش سمیت کرد ملیشیا کے خلاف آپریشن کے لیے فوجی کارروائی کا اعلان کردیا ہے اور فوجی کارروائی کے پہلے روز اب تک 8 افراد کے ہلاک ہونے کی اطلاعات موصول ہوئی ہیں۔
