ٹنڈوالٰہیار (نمائندہ جسارت) سندھ سمیت ٹنڈوالہٰیار میں پولیس کی سرپرستی میں کھلے عام منشیات، مین پوری سمیت نشہ آوار اشیا کی فر وخت کی میڈیا میں خبریں شائع ہونے اور سندھ ہائی کورٹ میں شہری کی جانب سے داخل کی جانے والی پٹیشن پر جسٹس سندھ ہائی کورٹ نے سخت احکامات جاری کردیے، منشیات فروشوں سمیت پولیس کی کالی بھیڑوں کیخلاف بھی بھرپور کارروائی کرنے کا فیصلہ کرلیا گیا، عدالت نے دس یوم میں آئی جی سندھ سے رپورٹ طلب کرلی گئی۔ ٹنڈوالہٰیار سمیت پورے سندھ میں انسانی جانوں کی موت کا سبب بننے والی مین پوری سمیت نشہ آوار اشیا کی فروخت میں ملوث پولیس اہلکاروں سمیت مین پوری فروخت کرنے والے افراد کیخلاف کسی بھی وقت کریک ڈائون کرنے کا فیصلہ کرلیا گیا۔ واضح رہے کہ مین پوری کی کھلے عام فروخت میں ملوث پولیس اہلکاروں سمیت قلم کا سایہ دینے والے افراد کیخلاف بھی کارروائی کیے جانے کا امکان ہے۔ ضلع بھر میں لاکھوں روپے کے بھتے کے ذریعے فروخت ہونے والی مین پوری نے کتنے ہی خاندانوں کے افراد کو کینسر سمیت دیگر بیماریوں میں مبتلا کر رکھا ہے اور اس سلسلے میں ٹنڈوالہٰیار سمیت سندھ بھر میں مین پوری کی فروخت نے ملک و قوم کے معماروں کو بیمار معمار بنادیا ہے۔ ذرائع کے مطابق سندھ ہائی کورٹ کے جسٹس نے پولیس کو ہدایت کی ہے کہ ماضی میں مین پوری کی فروخت میں گرفتار ہونے والوں کے لیے کوئی واضح قانون نہ ہونے کے سبب مین پوری فروخت کرنے والے کم جرمانہ ادا کر کے دوبارہ سے یہ کاروبار کرنے میں مصروف ہوجاتے تھے اور مٹھائی کی رقم میں اصافہ کردیا جاتا تھا، اس وقت مین پوری کی فروخت میں گرفتار ہونے والوں کیخلاف مقدمہ درج کرنے کی ہدایت کی گئی ہے۔ ٹنڈوالہٰیار کے شہریوں سمیت سندھ کے عوام نے عدالت کے اس فیصلے کو سراہا جبکہ ٹنڈوالہٰیار میں سٹیزن جرنلزم نیٹ ورک کی جانب سے ضلع بھر میں مین پوری سمیت منشیات کی کھلے عام فروخت کیخلاف 6 اکتوبر کو پیدل مارچ کرنے کا اعلان کردیا ہے۔ اس سلسلے میں مذکورہ پلیٹ فارم کے رہنمائوں کی جانب سے ضلع بھر کے سیاسی، سماجی، مذہبی پارٹیوں کے رہنمائوں سمیت بیورو کریٹ افسران کو بھی اس ناسور کے خاتمے کے لیے بھرپور شرکت کرنے کے لیے دعوت نامے جاری کردیے گئے ہیں، دیکھنا یہ ہے کہ ضلعی انتظامیہ اور پولیس انتظامیہ کب اس ناسور میں ملوث افراد کیخلاف کارروائی کو یقینی بنائیں گے۔
