اقوام متحدہ کی افغانستان میں بڑھتے ہوئے حملوں کی مذمت

119

نیویارک (صباح نیوز) اقوام متحدہ کی سلامتی کونسل نے افغانستان میں دہشت گردی کے بڑھتے ہوئے واقعات کی مذمت کرتے ہوئے ان حملوں کو ناقابل قبول عمل قرارد یدیا۔ غیر ملکی خبر رساں ادارے کے مطابق اقوامِ متحدہ کی سلامتی کونسل کے اعلامیے میں کہا گیا کہ سیکورٹی کونسل کے ارکان افغانستان میں ہونے والے دہشت گردی کے واقعات کی سخت مذمت کرتے ہیں۔ اعلامیے میں کابل دھماکوں اور افغان صدر کی ریلی پر حملے کی مذمت کرتے ہوئے کہا گیا کہ پرتشدد واقعات بہر صورت بند ہونے چاہئیں، سلامتی کونسل کے ارکان حملوں میں ہلاک ہونے والوں کے لواحقین سے ہمدردی اور افسوس کا اظہار کرتے ہیں جبکہ زخمی ہونے والوں کی جلد صحت یابی کے لیے دعا گو ہیں۔ سلامتی کونسل نے تمام ملکوں پر زور دیتے ہوئے کہا ہے کہ بین الاقوامی قانون اور سلامتی کونسل کی قراردادوں کے تحت اس سلسلے میں افغان حکومت اور دیگر تمام متعلقہ حکام کے ساتھ تعاون کو یقینی بنائیں۔