کراچی (اسٹاف رپورٹر) پاکستان کرکٹ بورڈ نے سری لنکا کے خلاف سیریز کے لئے قومی کرکٹ ٹیم کے ممکنہ کھلاڑیوں کے ناموں کا اعلان کردیا۔ گذشتہ روز تربیتی کیمپ کے لئے 20 ممکنہ کھلاڑیوں کا اعلان قومی کرکٹ ٹیم کے ہیڈ کوچ اور چیف سلیکٹر مصباح الحق نے کیا۔ کھلاڑیوں میں کپتان سرفراز احمد، بابر اعظم، احمد شہزاد، آصف علی، عابد علی، عثمان شنواری اور فہیم اشرف، فخر زمان، حارث سہیل، حسن علی، افتخار احمد، عماد وسیم، وہاب ریاض اور امام الحق، محمد عامر، محمد حسنین، محمد نواز، محمد رضوان، شاداب خان اور عمر اکمل شامل ہیں۔ تمام کھلاڑی کل نیشنل کرکٹ اکیڈمی لاہور میں رپورٹ کریں گے۔ مصباح الحق 21 ستمبر کو قومی ایک روزہ اور ٹی ٹوئنٹی ٹیموں کا اعلان کریں گے، قومی ایک روزہ کرکٹ ٹیم 24 ستمبر کو کراچی روانہ ہوجائے گی، سری لنکا کے خلاف ایک روزہ اور ٹی ٹوئنٹی سیریز 27 ستمبر سے 9 اکتوبر تک جاری رہے گی ،پی سی بی نے سری لنکا سیریز اور دورہ آسٹریلیا کے لئے ٹیم منیجمنٹ کا اعلان بھی کردیا، مصباح الحق ہیڈ کوچ اینڈ چیف سلیکٹر، منصور رانا ٹیم آپریشنز، لاجسٹک اینڈ ایڈمنسٹریٹو منیجر کی حیثیت سے ذمہ داریاں نبھائیں گے، وقار یونس بولنگ کوچ، بریڈ برن فیلڈنگ کوچ اور شاہد اسلم اسسٹنٹ ٹو ہیڈ کوچ آن کرکٹ مقرر کردیئے گئے۔ کلف ڈیکن فزیو تھراپسٹ، یاسر ملک ٹرینر، رضا راشد میڈیا منیجر، طلحہ بٹ اینالسٹ اور ملنگ علی مساجر بھی ٹیم منیجمنٹ کا حصہ ہونگے۔ میجر ریٹائرڈ اظہر عارف کو سری لنکا سیریز کے لئے سیکورٹی منیجر مقرر کیاگیا جبکہ کرنل ریٹائرڈ عثمان انوری دورہ آسٹریلیا پر سیکورٹی منیجر کی ذمہ داریاں نبھائیں گے۔
