دہری شہریت کیس ،سابق چیئرمین نادرا طارق ملک بے گناہ قرار

78

اسلام آباد(صباح نیوز) ماڈل کورٹ نے سابق چیئرمین نادرا طارق ملک کو دہری شہریت چھپانے کے کیس میں بے گناہ قرار دے دیا۔ پیر کو ماڈل کورٹ کی جج شائستہ کنڈی نے 2 صفحات پر مشتمل فیصلے میں حکم دیا کہ طارق ملک کے خلاف 15
مئی2014 کو درج کردہ ایف آئی آر خارج کی جائے۔ طارق ملک کے خلاف پاسپورٹ ایکٹ 1974 کے سیکشن ون اے اور سی کے تحت درج مقدمے میں الزام لگایا گیا کہ انہوں نے دہری شہریت اور گورنمنٹ سرونٹ ہونا چھپایا تھا۔طارق ملک نے رواں برس11جولائی کو ایف آئی اے کے سامنے اپنے بیان میں کہا کہ انہوں نے دہری شہریت نہیں چھپائی، وہ نائیکوپ کارڈ رکھتے ہیں اور16 اپریل 2010 کومشین ریڈایبل پاسپورٹ کا فارم جمع کراتے ہوئے اس کا ذکر کیا، تحریری فیصلے کے مطابق نادرا نے بھی طارق ملک کے نائیکوپ کی تصدیق کی۔علاوہ ازیں طارق ملک نے16 مارچ 2002 کے مینوئل پاسپورٹ کی کاپی عدالت میں پیش کی جس میں ظاہر کیا گیاکہ وہ گورنمنٹ سرونٹ ہیں، طارق ملک کے خلاف مقدمہ (ن) لیگ حکومت کی جانب سے دائر کیا گیا تھا، طارق ملک اس وقت اقوام متحدہ کے ترقیاتی پروگرام کے چیف ٹیکنیکل ایڈوائزر ہیں۔ انہوں نے کہا کہ پاکستان میں حصول انصاف کے لیے مروجہ طریق کار بذات خود ایک سزا کے مترادف ہے جن لوگوں نے جھوٹے الزامات لگائے کیا ان کوسزا ملے گی؟۔
دہری شہریت کیس