معاشی کارکردگی پر عدم اطمینان، آئی ایم ایف مشن آج پاکستان آئیگا

اسلام آباد (صباح نیوز) معاشی کارکردگی پر عدم اطمینان، آئی ایم ایف مشن آج پاکستان آئے گا۔ کل منگل کو قومی اسمبلی کی قائمہ کمیٹی خزانہ و اقتصادی امور کے ان کیمرا اجلاس میں شریک ہوگا۔وفد کو ٹیکس آمدن پر بریفنگ دی جائے گی۔ تفصیلات کے مطابق رواں مالی سال کی پہلے دو ماہ میں پاکستان کی معاشی کارکردگی پر عدم اطمینان کے باعث آئی ایم ایف کا ایس او ایس مشن آج (پیر کو) پاکستان آئے گا۔ آئی ایم ایف کا ایس او ایس مشن حکام وزارت خزانہ سے مشاورت کرے گا۔ مشن کو بتایا جائے گا کہ 648 ارب روپے کے ٹیکس ہدف کے تعاقب میں 580 ارب روپے جمع ہونے کی وجوہات کا جائزہ لیا جائے گا۔ اس کے علاوہ اس پر بھی غور کیا جائے گا کہ گیس اور بجلی کے نقصانات کم کرنے کے لیے حکمت عملی پر کتنا عمل ہوا۔ ایس او ایس مشن کی سربراہی آئی ایم ایف کے ڈائریکٹر جنوبی اور وسطی ایشیا جہاد اظہور کریں گے۔ وفد معاشی، ٹیکس اور توانائی اصلاحات پر مشاورت کرے گا جبکہ آمدن بڑھانے اور اخراجات میں کمی کے لیے بھی مختلف تجاویز پر غور ہوگا۔ 17ستمبر کو قومی اسمبلی کی قائمہ کمیٹی خزانہ و آئی ایم ایف مشن کا مشترکہ اجلاس پارلیمنٹ ہائوس میں اسد عمر کی صدارت میںہوگا، اجلاس کی کارروائی ان کیمرا ہوگی۔