بھارتی مظالم کیخلاف عالمی برادری اقدامات کرے‘ راحیل شریف

51

ریاض (آن لائن) اسلامی فوجی اتحاد کے سربراہ راحیل شریف نے کہا ہے کہ مقبوضہ کشمیر میں بھارتی مظالم رکوانے کے لیے عالمی برادری فوری اقدامات کرے۔ اسلامی فوجی اتحاد کے کمانڈر راحیل شریف نے سعودی دارالحکومت ریاض میں پاکستانی سفارتخانے میں تقریب سے خطاب کرتے ہوئے کہا کہ مقبوضہ کشمیر میں ہونے والے مظالم اور مسلمانوں کی نسل کشی پر عالمی برادری کو فوری اقدامات کرنے کی ضرورت ہے‘ نریندر مودی کی سربراہی میں بھارتی فاشسٹ حکومت نے تمام حدیں پار کردی ہیں‘ پاک فوج کسی بھی چیلنج کا مقابلہ عزت کے ساتھ کرسکتی ہے‘ جنگ ستمبر کے دوران مسلح افواج کا قومی جذبہ اور بہادری بے مثال تھا‘ تمام شہدا کو مادر وطن کے لیے اپنی جانیں دینے پر خراج عقیدت پیش کرتا ہوں۔ راحیل شریف نے مزید کہا کہ کشمیر تقسیم کا ایک نامکمل ایجنڈا ہے‘ خطے میں استحکام کے لیے مسئلہ کشمیر کو اقوام متحدہ کی قراردادوں اور عوام کی امنگوں کے مطابق حل کرنا ہوگا۔