شمالی وزیرستان میں غیر مقامی افراد کے داخلے پر پابندی عاید

شمالی وزیرستان ( آن لائن )شمالی وزیرستان میں ضلعی انتظامیہ نے غیر مقامی افراد کے داخلے پر پابندی لگا دی۔ضلعی پولیس افسر کی سفارش پر ضلع بھر میں دفعہ 144 نافذ کر کے غیر مقامی افراد کے داخلے پر پابندی لگائی گئی ہے۔ ضلعی انتظامیہ نے غیر مقامی افراد کو امن و امان کے لیے خطرہ قرار دیا ہے۔ضلعی انتظامیہ کے مطابق غیر مقامی سرکاری ملازمین اور مزدور اس پابندی سے مستثنیٰ ہوں گے جبکہ خلاف ورزی کرنے والے عناصر کے خلاف قانون کے مطابق کارروائی کی جائے گی۔ واضح رہے کہ2 ماہ قبل 10 جون کو بھی شمالی وزیرستان میں ایک ماہ کے لیے دفعہ 144 نافذ کی گئی تھی جس میں غیر مقامی افراد کے داخلے کو ممنوع قرار دیا تھا جبکہ سیاسی سرگرمیوں پر مکمل پابندی عاید تھی۔ حکم کی خلاف ورزی کرنے والوں کے خلاف سخت کارروائی کرنے کا حکم دیا گیاتھا۔ اس سے قبل بھی حالات کے پیش نظر شمالی وزیرستان میں اس طرح کی
پابندی عاید کی جاتی رہی ہے۔ 26 مئی بروز اتوار کو رکن قومی اسمبلی محسن داوڑ نے اپنے ساتھیوں سمیت مبینہ طور پر شمالی وزیرستان کے علاقے خاڑ کمر میں چیک پوسٹ پر حملہ کر دیا تھا جس کے نتیجے میں ایک اہلکار شہید اور 4 زخمی ہو گئے تھے۔ جوابی کارروائی میں 3 حملہ آور مارے گئے۔
شمالی وزیرستان