ڈی جی آئی ایس پی آر میجرجنرل آصف غفور کا کہنا ہے کہ افواج پاکستان نے ملکی سرحدوں کا بھرپور دفاع کیا جس کے باعث ملک کی داخلی سلامتی کی صورتحال بہتر ہو رہی ہے۔
واشنگٹن میں میڈیا سے گفتگو کرتے ہوئے ڈی جی آئی ایس پی آر نے کہا کہ پاکستانی عوام اورسیکیورٹی اداروں کی کوششیں اور قربانیاں رنگ لارہی ہیں،پاکستان کی داخلی سلامتی صورتحال پہلے سے بہت بہتر ہے جب کہ دہشتگردی سے متاثرہ علاقوں میں سول انتظامیہ سے ملکر بحالی کا کام جاری ہے۔ انہوں نے کہا کہ سیکیورٹی فورسز کی بنیادی توجہ اب بلوچستان کی طرف ہے، بلوچستان میں حکومتی ترقیاتی منصوبے فوج کی مدد سے جاری ہیں۔
میجرجنرل آصف غفور نے پاک افغان سرحد پر باڑ کوسیکیورٹی کیلئے اہم قرار دیا۔ انکا کہنا تھا کہ پاک افغان سرحد پر باڑ لگانے سے سرحدی کنٹرول میں بہتری آ رہی ہے۔ اس سے دہشتگردی کے واقعات بتدریج کم ہوں گے۔
ترجمان پاک فوج کا کہنا تھا کہ پاکستانی میڈیا نے بیرون ملک پاکستان کا مثبت امیج اجاگر کرنے میں اہم کردار ادا کیا۔
