گورنر ہاؤس لاہور کو عوام کے لیے کھول دیا گیا

224

حکومت نے گورنر ہاؤس سندھ اور گورنر ہاؤس مری کے بعد آج گورنر ہاؤس پنجاب کو بھی عوام کے لیے کھول دیا گیا۔

تفصیلات کے مطابق حکومت کی کفایت شعاری مہم کے تحت جہاں وزیراعظم و گورنر ہاؤسز کے اخراجات میں کمی لائی جارہی ہے وہیں انہیں عوام کے لیے بھی کھولنے کا سلسلہ جاری ہے۔ گورنر ہاؤس سندھ اور گورنر ہاؤس مری کے بعد گورنر ہاؤس پنجاب کو بھی عوام کے لیے کھول دیا گیا، جس کو دیکھنے کے لیے لوگوں کی بڑی تعداد مقررہ وقت سے پہلے ہی گورنر ہاؤس پہنچ گئی جنہیں 10 بجتے ہی گورنر ہاؤس کے کشمیر روڈ کے گیٹ سے اندر جانے کی اجازت دی گئی۔

گورنر ہاؤس پنجاب میں آبشار، جھیل، بارہ دری اور چڑیا گھر سمیت بہت سی پرکشش جگہیں ہیں۔ عوام نے بارہ دری، پہاڑی اور لان میں گہری دلچسپی لی اور تصاویر بنائیں۔ خواتین، بچے اور بڑے گورنر ہاؤس کی سیر کرکے سب خوش دکھائی دیے۔

گورنر پنجاب چوہدری محمد سرور کے اعلان کے مطابق عوام اپنے اہل خانہ کے ہمراہ ہر اتوار صبح 10 بجے سے شام 6 بجے تک گورنر ہاؤس کی سیر کر سکیں گے۔

انتظامیہ کی جانب سے سیر کے لیے گورنر ہا ؤ س آنے والے اہلخانہ کے سربراہ کے پاس شناختی کارڈ لانا لازمی قرار دیا گیا ہے۔انتظامیہ کی جانب سے ہدایت کی گئی ہے کہ شہری غیر متعلقہ چیزوں کو نہ چھوئیں، ڈیوٹی پر موجود اہلکاروں سے تعاون کریں اور گورنر ہاؤس کی املاک کو نقصان پہنچانے سے گریز کریں۔

واضح رہے کہ گورنر ہاؤس سندھ اور گورنر ہاؤس مری کو بھی کھول دیا گیا ہے اور شہری ان سرکاری عمارتوں کی سیر کرکے لطف اندوز ہورہے ہیں۔

Print Friendly, PDF & Email
حصہ

جواب چھوڑ دیں

This site uses Akismet to reduce spam. Learn how your comment data is processed.