پاکستان اور ترکی میں جدید ہیلی کاپٹرزکی خریداری کے معاملے کو حتمی شکل دیدی گئی 

119

انقرہ (صباح نیوز) پاکستان اور ترکی کے درمیان جدید لڑاکا ہیلی کاپٹرز کی خریداری کے معاہدے کو حتمی شکل دے دی گئی۔ ترک میڈیا کے مطابق پاکستان نے ترکی سے جدید ترین جنگی ٹی 129 ہیلی کاپٹرز کی خریداری کے لیے دلچسپی ظاہر کی تھی اور اس سلسلے میں پاکستان کی وزارت دفاع کے حکام اور ترکش ایرو اسپیس انڈسٹریز کے مابین مذاکرات ہوئے جس میں معاہدے کو حتمی شکل دی گئی ہے۔ میڈیا رپورٹس کے مطابق ہیلی کاپٹرز کی خریداری کا یہ معاہدہ اسلام آباد اور انقرہ کے مابین دفاعی تعلقات اور دوطرفہ عسکری تعاون کی نئی سمتوں کا تعین کررہا ہے۔ معاہدے کے تحت ترکی مرحلہ وار 5 برس میں یہ ہیلی کاپٹرز پاکستان کو فراہم کرے گا جبکہ یہ معاہدہ ترکی کی دفاعی صنعت کا اب تک سب سے بڑا برآمدی معاہدے ہے۔ ٹی 129 فضائی حدود کی حفاظت اور ملکی دفاع کے لیے عہد حاضر کا ایک جدید اور انتہائی کارآمد ہیلی کاپٹر ہے۔ 2 انجن والا یہ ہیلی کاپٹر 2 نشستوں پر مشتمل ہے جوکہ خصوصی طور پر حملے، تیز رفتاری اور دشمن کی جاسوسی کے لیے ڈیزائن کیا گیا ہے۔نومبر 2017ء میں اس وقت کے وزیربرائے دفاعی پیداوار رانا تنویر حسین نے ترکی کے خبررساں ادارے کو انٹرویو میں کہا تھا کہ ہم ترکی سے 30 جدید ہیلی کاپٹر اور 4 بحری جہاز خریدنے کی منصوبہ بندی کررہے ہیں۔ گزشتہ سال دورہ ترکی کے دوران پاکستانی وزیراعظم شاہد خاقان عباسی نے ٹی 129 اے ٹی اے کے ہیلی کاپٹر کی آزمائشی پرواز کا مشاہدہ و تجزیہ کیا تھا جس میں انہوں نے اسے متاثرکن ہیلی کاپٹر قرار دیتے ہوئے اسے جلد سے جلد پاک فوج میں شامل کرنے کی خواہش کا اظہار کیا تھا۔

Print Friendly, PDF & Email
حصہ

جواب چھوڑ دیں

This site uses Akismet to reduce spam. Learn how your comment data is processed.