پی یس ایل تھری: ملتان سلطانز نے پشاور زلمی کو شکست دے دی

657
پی یس ایل تھری: ملتان سلطانز نے پشاور زلمی کو شکست دے دی
پی یس ایل تھری: ملتان سلطانز نے پشاور زلمی کو شکست دے دی

دبئی (نمائندہ خصوصی ) متحدہ عرب امارات کے شہر دبئی میں کھیلے گئے پاکستان سپر لیگ تھری کے افتتاحی میچ میں ملتان سلطانز نے سابق چیمپئن پشاور زلمی کو شکست دے کر ایونٹ میں اپنا فاتحانہ آغاز کر دیا ہے۔ پشاور زلمی نے پہلے کھیلتے ہوئے سلطانز کو جیت کے لیے 152 رنز کا ہدف دیا تھا جو اس نے صرف 3 وکٹوں کے نقصان پر حاصل کر لیا۔ ہدف کے تعاقب میں احمد شہزاد اور کمارا سنگاکارا میدان میں اترے لیکن اسکور ابھی 7 تک ہی پہنچا تھا کہ احمد شہزاد بغیر کوئی رن بنائے اپنا کیچ دے بیٹھے۔ اس کے بعد کمارا سنگاکارا کا ساتھ دینے صہیب مقصود میدان میں اترے لیکن کرکٹ شائقین کو اپنے بلے کا جادو نہ دکھا سکے۔ صہیب مقصود نے ایک چھکے اور 3 چوکوں کی مدد سے 21 رنز بنائے۔ شعیب ملک اور کمارا سنگاکارا کی جوڑی کی مدد سے ملتان سلطانز نے 10 اوورز میں 2 وکٹوں کے نقصان پر 68 رنز بنائے۔ بعد ازاں دونوں کھلاڑیوں نے 13.5اوورز میں ٹیم کا اسکور 100 سے زائد رنز تک پہنچا دیا۔ٹیم کا اسکور 106 تک پہنچا تو کمارا سنگاکارا وکٹوں کے پیچھے اپنا کیچ دے بیٹھے۔ لیجنڈ بلے باز نے اپنی بیٹنگ سے شائقین کرکٹ کو بہت محظوظ کیا۔ انہوں نے 3 چوکوں اور 2 چھکوں کی مدد سے 57 رنز کی جارحانہ اننگز کھیلی۔ملتان سلطانز کی جیت میں کپتان شعیب ملک نے اہم کردار ادا کیا اور اپنی تجربہ کاری سے ٹیم کو پی ایس ایل تھری کے پہلے میچ کا فاتح بنا دیا۔ آخری اوور میں ملتان سلطانز کو جیت کے لیے 6 رنز درکار تھے تاہم شعیب ملک نے آخری اوور کی پہلی گیند پر چھکا کر ٹیم کو 7 وکٹوں سے جیتا دیا۔ ملتان سلطانز نے 19.5اوورز میں مقررہ ہدف صرف 3 وکٹوں کے نقصان پر حاصل کیا۔ شعیب ملک نے ناٹ آؤٹ اننگز کھیلتے ہوئے 2 چوکوں اور 2 چھکوں کی مدد سے 42 رنز بنائے۔پشاور زلمی کی جانب سے وہاب ریاض کامیاب گیند باز رہے جنہوں نے 2وکٹیں حاصل کیں جبکہ محمد اصغر کے حصے میں ایک وکٹ آئی۔ قبل ازیں پشاور زلمی کی جانب سے کامران اکمل اور تمیم اقبال میدان میں اترے۔ میچ کی صورتحال اس وقت دلچسپ ہو گئی جب تمیم اقبال کو ایمپائر نے کیچ آؤٹ قرار دیا لیکن ریویو میں تھرڈ ایمپائر نے انہیں ناٹ آؤٹ قرار دیدیا، لیکن اسی اوور کے چوتھے گیند پر کامران اکمل ایک اونچی شارٹ کھیلنے کی کوشش میں اپنا کیچ دے بیٹھے۔ کامران اکمل بغیر کوئی رن بنائے آؤٹ ہوئے جبکہ اس وقت پشاور زلمی کا اسکور صرف 4 تھا۔کامران اکمل کے آؤٹ ہونے کے بعد ڈیوائن سمتھ میدان میں اترے اور آتے ہی جارحانہ بلے بازی کا آغاز کر دیا، دوسری جانب تمیم اقبال نے بھی جرأت دکھائی لیکن اپنی وکٹ نہ بچا پائے۔ محمد عرفان کی گیند پر ایک غیر ضروری شارٹ کھیلنے کی کوشش میں انہوں نے بھی اپنی وکٹ گنوائی۔ تمیم اقبال نے 2 چوکوں کی مدد سے 11 رنز بنائے اور ان کا کیچ جنید خان نے لیا۔اس کے بعد محمد حفیظ نے وکٹ سنبھالی اور سمتھ کے ساتھ مل کر پشاور زلمی کے اسکور کو آگے بڑھایا۔ میچ میں دوبارہ اس وقت دلچسپ صورتحال پیدا ہو گئی جب عمران طاہر کی گیند پر ایمپائر نے ڈیوائن سمتھ کو ایل بی ڈبلیو آؤٹ قرار دیدیا لیکن ریویو میں انہیں اپنا یہ فیصلہ بھی واپس لینا پڑا۔ حفیظ اور سمتھ کی جوڑی نے ٹیم کے اسکور کو 50 سے زائد رنز تک پہنچایا۔پشاور زلمی کے تیسرے آؤٹ ہونے والے کھلاڑی ڈیوائن سمتھ ہی بنے جن کی وکٹ عمران طاہر کے حصے میں آئی۔ سمتھ ایک اونچی شارٹ کھیلنے کی کوشش میں باؤنڈری کے قریب اپنا کیچ دے بیٹھے۔ انہوں نے 3 چوکوں کی مدد سے 24 رنز بنائے۔ اس کے بعد محمد حفیظ نے محتاط انداز اپنایا اور حارث سہیل کے ساتھ مل کر ٹیم کاا سکور 101 تک پہنچایا۔پشاور زلمی کے چوتھے آؤٹ ہونے والے کھلاڑی حارث سہیل تھے جنہوں نے صرف 14 رنز بنائے اور سہیل تنویر کی گیند پر ولیجوئن نے ان کا کیچ لیا۔ زلمی کے پانچویں وکٹ 132 کے اسکور پر گری جب ذمے داری سے بلے بازی کا مظاہرہ کر رہے محمد حفیظ کیچ آؤٹ ہو گئے۔ حفیظ نے 6 چوکوں اور ایک چھکے کی مدد سے 59 رنز کی شاندار اننگز کھیلی۔پشاور زلمی کے کپتان ڈیرن سیمی نے قائدانہ اننگز کھیلی اور جارحانہ بلے بازی کا مظاہرہ کرتے ہوئے ٹیم کے اسکور کو 150 سے زائد تک پہنچایا لیکن میچ کے آخری اوور میں وکٹوں کے پیچھے کیچ دے بیٹھے۔ ڈیرن سیمی نے صرف 11 گیندوں پر 3 چھکوں اور 2 چوکوں کی مدد سے 29 رنز بنائے۔ پشاور زلمی نے مقررہ 20 اوور میں 6 وکٹوں کے نقصان پر 151 رنز بنائے۔ملتان سلطانز کی جانب سے محمد عرفان کامیاب بولرز رہے جنہوں نے 2 وکٹیں حاصل کیں جبکہ سہیل تنویر، جنید خان، عمران طاہر اور ہارڈس ولیجوئن نے ایک، ایک کھلاڑی آؤٹ کیا۔پشاور زلمی کی قیادت ڈیرن سیمی کر رہے ہیں جبکہ دیگر کھلاڑیوں میں کامران اکمل، تمیم اقبال، ڈیوائن سمتھ، محمد حفیظ، حارث سہیل، حماد اعظم، جورڈن، وہاب ریاض، ابتسام شیخ اور محمد اصغر شامل ہیں۔
دبئی :ملتان سلطانز کے بولر محمد عرفان وکٹ لینے کے بعد ساتھی کھلاڑیوں سے داد وصول کررہے ہیں