بوسٹن(مانیٹرنگ ڈیسک ) برطانوی وزیر خارجہ ڈیوڈ ملی بینڈ نے افغان حکومت پر طالبان کو جلد امن عمل میں شامل کرنے پر زور دیتے ہوئے کہا ہے کہ پاکستان کی شمولیت کے بغیر افغانستان میں کوئی تصفیہ ممکن نہیں۔ امریکا کے میساچوسٹس انسٹی ٹیوٹ آف ٹیکنالوجی میں ملی بینڈ کے خطاب سے قبل جاری ان کی تقریر کے اقتباسات کے مطابق برطانوی وزیر خارجہ کا کہنا ہے کہ وقت آگیا ہے افغان جنگ کو ختم کرنے کی راہ ڈھونڈنا ہوگی کیونکہ امریکی قیادت میں وہاں جنگ سے متعلق عوام کو مطمئن کرنا ناکافی ہے۔ افغانستان میں پائیدار امن اس وقت تک قائم نہیں ہوسکتا جب تک افغان عوام کو اس میں شامل نہ کیا جائے اور پڑوسی ممالک وہاں سیاسی تصفیے کی حمایت نہ کریں۔ انہوں نے زور دیتے ہوئے کہا کہ پاکستان کی شمولیت کے بغیر افغانستان میں کوئی تصفیہ ممکن نہیں۔ اسی طرح بھارت، روس اور چین بھی مسئلے کے حل کے لیے اہم ہیں۔