لاک ڈاؤن سے غریب طبقہ فاقوں پر مجبور ہوچکا ہے،ذکراللہ مجاہد

لاہور (نمائندہ جسارت) امیر جماعت اسلامی لاہور ڈاکٹرذکر اللہ مجاہد کہا ہے کہ لاک ڈاؤن کی وجہ سے غریب اور دار طبقہ فاقوں پر مجبور ہوچکا ہے۔ حکمران زبانی جمع خرچ کے بجائے غریب اور سفید پوش طبقات کو دووقت کی روٹی کیلیے اقدامات کریں۔ ان خیالات کا اظہار انہوں نے دفتر جماعت اسلامی لاہور میں شہر میں قائم 30 کورونا ریلیف سینٹرز کے حوالے سے ضلعی عہدیداران کے اجلاس میں حکومت سے مطالبہ کرتے ہوئے کیا۔ اس موقع پر اجلاس میں سیکرٹری جنرل جماعت اسلامی لاہور انجینئر اخلاق احمد، نائب امراء جماعت اسلامی لاہور ضیاء الدین انصاری، ملک شاہد اسلم، اظہر بلال، صدر الخدمت فاؤنڈیشن لاہور عبدالعزیز عابد، ڈپٹی سیکرٹریز جماعت اسلامی لاہور مرزا عبدالرشید، عبدالحفیظ اعوان، عمر شہباز و دیگر عہدیداران شریک تھے۔ ڈاکٹر ذکر اللہ مجاہد نے مزید کہا کہ حکومت کے کورونا ریلیف پیکیجز میں مستحق افراد کوریلیف دینے کا طریقہ کار دہاڑی دار، غریب، سفید پوش اور متوسط طبقات کے افراد کی پہنچ سے دور اور سمجھ سے بالاتر ہے۔ دہاڑی دار آن لائن اور انٹرنیٹ کی سہولیات سے ناواقف ہونے کی بنا پر ان سہولیات سے فائدہ اٹھانے سے محروم ہے۔ انہوں نے کہا کہ کورونا وائرس کی وبا نے پوری دنیا کو اپنی لپیٹ میں لے لیا ہے۔ پاکستان میں 70 فیصد سے زیادہ عوام متوسط طبقات سے تعلق رکھتی ہے اور یہاں مسلسل لاک ڈاؤن کی وجہ سے غریب لوگ بھوک و افلاس شدید اذیت میں مبتلا ہیں اگر حکمرانوں نے ان کی دوقت کی روٹی کا بندوبست نہ کیا تو حالات مزید خراب ہونے کا اندیشہ ہے اور پھر لوگ کورونا نہیں بھوک کی وجہ سے مرنا شروع ہوجائیں گے۔ ڈاکٹر ذکر اللہ مجاہد نے عہدیداران کو ہدایات دیتے ہوئے کہا کہ جماعت اسلامی اور الخدمت فاؤنڈیشن محدود وسائل میں اہل لاہور کے دہاڑی دار، غریب اور سفید پوش افراد کو پکا ہوا کھانا، خشک راشن اور کچی سبزی پہنچانے کیلیے اپنے تمام وسائل بروئے کار لارہی ہے۔ دو کروڑ کی آبادی کے شہر میں یہ وسائل کہیں کم ہیں، ان حالات میں ہمیں اہل خیر اور مخیر حضرات سے مسلسل رابطے کی ضرورت ہے جنہیں اللہ رب العزت نے وسائل سے نوازا ہے ان میں خدمت خلق کے حوالے سے شعور اور جذبہ پیدا کرنے کی ضرورت ہے کہ وہ اس مشکل گھڑی میں قوم کا ساتھ دیں۔ انہوں نے کہا کہ کورونا وبا کی وجہ سے پیدا ہونے والی صورتحال میں تمام اداروں کو پہلے سے زیادہ متحرک ہو کر کام کرنے کی ضرورت ہے۔ جماعت اسلامی اور الخدمت فاؤنڈیشن اس مشکل وقت میں اہل لاہور کو تنہا نہیں چھوڑے گی۔ دہاڑی دار مزدور اور غربیوں کیلیے اینٹی کورونا سامان، پکا ہوا کھانا، سبزیاں اور خشک راشن کی فراہمی کو یقینی بنانے کیلیے 30 کورونا ریلیف سینٹرز اور الخدمت کمیٹیاں خدمت خلق کے کام کو جاری رکھیں گی۔