سعودی حکومت نے کورونا وائرس کے خطرے کے پیش نظر حکومت پاکستان کو حج معاہدوں سے روک دیا ہے جس کے بعد رواں سال حج نہ ہونے کے حوالے سے خدشات جنم لینے لگے ہیں۔
تفصیلات کے مطابق سعودی وزیر حج کی جانب سے وزارت مذہبی امور کو مراسلہ بھیجا گیا ہے جس میں پاکستان کو کورونا وائرس کے پیش نظر فی الحال حج معاہدے نہ کرنے کا کہا گیا ہے۔
مراسلے میں کہا گیا ہے کہ سعودی حکومت اس معاملے پر نظر رکھے ہوئے ہے، صورتحال بہتر ہوتے ہی اس حوالے سے آگاہ کیا جائے گا۔
سعودی حکام کی جانب سے بھیجے گئے مراسلے کے بعد وزارت مذہبی امور نے حج کے حوالے سے معاہدوں پر کام روک دیا ہے۔
واضح رہے کہ اس طرح کی خبریں سامنے آرہی ہے کورونا وائرس کے خطرے کے پیش نظر رواں سال حج نہ ہوسکے تاہم سعودی وزیر حج نے یقین دہانی کروائی ہے کہ اگر ممکن ہوسکا تو حج ضرور ہوگا۔