گھس کر مارنے کی دھمکی دینے والوں کو پاکستان نے سبق سکھادیا،فواد چوہدری

104
جہلم: وفاقی وزیر اطلاعات فواد چودھری عوامی اجتماع سے خطاب کررہے ہیں
جہلم: وفاقی وزیر اطلاعات فواد چودھری عوامی اجتماع سے خطاب کررہے ہیں

جہلم(صباح نیوز)وفاقی وزیر اطلاعات و نشر یات فواد چودھری نے کہا ہے کہ گھس کر مارنے کی دھمکی دینے والوں کو پاکستان نے سبق سکھادیا۔جہلم میں عوامی اجتماع سے خطاب کرتے ہوئے فواد چودھری نے گھس کر مارنے کی بڑھکیں مارنے والے نریندر مودی کو کرارا جواب دیتے ہوئے کہا کہ کہتے تھے گھس کر ماریں گے ، گھس کر دیکھ لیا ناں ! پھر کیا بنا ؟ ہم نے انہیں سبق سکھا دیا ۔فواد چودھری نے کہا کہ وزیراعظم عمران خان کی امن پسندانہ پالیسی نے جنگ کو ٹال دیا اور یہی وجہ ہے کہ امریکی میڈیا کہتا ہے کہ پاکستان کے وزیراعظم کو امن کا نوبل انعام دینا چاہیے کیونکہ انہوں نے دنیا کو اتنی بڑی جنگ سے بچایا ہے، اگر عمران خان کو عزت ملتی ہے تو پاکستان کو عزت ملتی ہے مگر جو لوگ اسمبلی میں عمران خان کا مذاق اڑاتے ہیں ان کے نزدیک فوج کا بھی کوئی احترام نہیں ہے۔وفاقی وزیر نے کہا کہ آج خلیجی ریاستوں سمیت دنیا عمران خان کو عزت و احترام دے رہی ہے، عمران خان کو ملنے والی عزت دراصل پاکستان اور پاکستانی قوم کی عزت ہے، پوری قوم عمران خان کے پیچھے کھڑی ہے۔اپوزیشن کو آڑے ہاتھوں لیتے ہو ئے فواد چودھری نے کہا کہ خورشید شاہ کہتے ہیں کہ نوازشریف کو کچھ ہوا تو مقدمہ عمران خان پر کریں گے ، دراصل ان کو نوازشریف کی نہیں بلکہ اپنے جیل جانے کی فکر ہے،انہوں نے جو کرتوت کیے وہ سب کے سامنے ہیں،حکومت کا اپوزیشن سے کوئی جھگڑا نہیں صرف ایک لڑائی ہے کہ عوام کے پیسوں کا حساب دو، جب ان سے حساب مانگا جائے تو کہتے ہیں میں بیمار ہوں،ہم کہتے ہیں ’نہ رو‘، ’حساب دو‘ ، وہ کہتے ہیں این آر او۔