ڈاکٹر ادیب رضوی کے انتقال کی خبریں جھوٹی ہیں، ایس آئی یو ٹی

302

سوشل میڈیا پر فیک نیوز یعنی جعلی خبروں کی بھرمار ہے، جنہیں لوگ بغیر تصدیق کے آگے بڑھاتے رہتے ہیں، حال ہی میں سندھ انسٹیٹوٹ آف یورولوجی اینڈ ٹرانسپلانٹیشن (ایس آئی یو ٹی) کے بانی ڈاکٹر ادیب رضوی کی علالت اور وفات کی خبریں بھی سوشل میڈیا پر گردش کر رہی ہیں، جن کی ایس آئی یو ٹی کی جانب سے تردید کردی گئی ہے۔

ایس آئی یو ٹی کی جانب سے جاری کیے گئے اعلامیے میں ڈاکٹر ادیب رضوی کے انتقال کی خبروں کو من گھڑت قرار دیتے ہوئے کہا گیا کہ سوشل میڈیا پر اس حوالے سے جھوٹی خبریں پھیلائی جارہی ہیں۔

اعلامیے کے مطابق ڈاکٹر ادیب رضوی کے خلاف جھوٹی خبروں پر قانونی چارہ جوئی کے لیے ایس آئی یو ٹی الیکٹرانک کرائمز ایکٹ 2016 کے تحت کارروائی پر غور کر رہا ہے۔

اعلامیے میں مطالبہ کیا گیا کہ ایک معزز شخصیت کی شہرت کو نقصان پہنچانے پر قانون نافذ کرنے والے ادارے کارروائی کریں۔

اس سے قبل ڈاکٹر ادیب رضوی کی علالت کے حوالے سے بھی خبریں گردش کر رہی تھیں، جس پر ایس آئی یو ٹی نے عوام کی آگاہی کے لیے ایک آفیشل سوشل میڈیا پیغام جاری کیا جس میں وضاحت کی گئی کہ اللہ کے کرم سے ڈاکٹر ادیب رضوی بالکل صحت مند ہیں۔

اس پیغام میں عوام سے یہ درخواست بھی کی گئی کہ غیر تصدیق شدہ خبروں کو پھیلانے سے گریز کریں اور کسی بھی قسم کی معلومات کے لیے ایس آئی یو ٹی کے آفیشل میڈیا سیل سے رابطہ کریں جو شعبہ معلومات عامہ کے تمام معاملات سنبھالتا ہے۔

نوٹ: سوشل میڈیا پر ’’فیک نیوز ‘‘یعنی جھوٹی خبروں کی بھرمار ہے ۔ یہ’’ فیک نیوز‘‘ سوشل میڈیا کے ذریعے تیزی سے پھیلتی ہیں، اور لوگ انھیں بغیرتصدیق کیے نہ صرف آگے بڑھاتے ہیں بلکہ ان پر اعتبار بھی کرتے ہیں۔

روزانہ دنیا بھر میں لاتعداد فیک نیوز بنا کر پھیلائی جاتی ہیں۔ جیو نیوز آپ کو آگاہ کرے گا کہ کون سی فیک نیوز سوشل میڈیا پر لوگوں کو گمراہ کر رہی ہے اور کن خبروں میں حقائق توڑ مروڑ کر پیش کیے جارہے ہیں۔

Print Friendly, PDF & Email
حصہ