صدر،وزیراعظم ،آرمی چیف سمیت اہم شخصیات کا کلثوم نواز کے انتقال پر اظہار افسوس

174

بیگم کلثوم نواز کی وفات پر صدر مملکت عارف علوی، وزیراعظم عمران خان، آرمی چیف جنرل قمر جاوید باجوہ، سراج الحق، چاروں وزرائے اعلیٰ و گورنرز، چیئرمین و ڈپٹی چیئرمین سینٹ، اسپیکر و ڈپٹی اسپیکر قومی اسمبلی نے افسوس کا اظہار کیا ہے۔

تفصیلات کے مطابق وزیراعظم عمران خان، آرمی چیف اور دیگر رہنماؤں نے سابق وزیر اعظم نواز شریف کی اہلیہ بیگم کلثوم نواز کے انتقال پر افسوس کا اظہار کیا ہے۔سینیٹر فیصل جاوید خان نے ٹوئٹ میں کہا کہ وزیر اعظم عمران خان نے محترمہ کلثوم نواز کی وفات پر دکھ اور افسوس کا اظہار کیا ہے۔انہوں نے کہا کہ حکومت محترمہ کلثوم نواز کی فیملی اور لواحقین کو قانون کے مطابق تمام سہولیات فراہم کرے گی۔

صدر مملکت ڈاکٹر عارف علوی نے بھی سابق وزیر اعظم نواز شریف کی اہلیہ بیگم کلثوم نواز کے انتقال پر دکھ و افسوس کا اظہار کیا اور پسماندگان کے لیے صبر و جمیل کی دعا کی۔

آرمی چیف جنرل قمر جاوید باجوہ نے بھی بیگم کلثوم نواز کے انتقال پر تعزیت کا اظہار کیا ہے۔

اسپیکر قومی اسمبلی اسد قیصر اور ڈپٹی اسپیکر محمد قاسم خان سوری نے بیگم کلثوم نواز کے انتقال پر گہرے دکھ اور افسوس کا اظہار کیا۔

جماعت اسلامی کے امیر سینیٹر سراج الحق کا کہنا تھا کہ بیگم کلثوم نواز صاحبہ کی وفات کا سن کر انتہائی افسوس ہوا۔ انہوں نے میاں نواز شریف سمیت تمام لواحقین سے تعزیت کا اظہار کیا۔

متحدہ قومی موومنٹ کے ناراض رہنما سید علی رضا عابدی نے بھی بیگم کلثوم نواز کے انتقال پر رنج و غم کا اظہار کیا۔ انہوں نے اپنے بیان میں امید کا اظہار کیا کہ نواز شریف، مریم نواز اور کیپٹن (ر)صفدر کو انسانی ہمدردی کی بنیاد پر ضمانت دی جائے۔

پاکستان پیپلز پارٹی کے رہنما قمر الزمان کائرہ نے بیگم کلثوم نواز کی وفات پر دکھ کا اظہار کرتے ہوئے کہا کہ بہت دکھ کی بات ہے، تمام لوگوں کو ان کی وفات پر بہت دکھ ہواہے، میں اپنی طرف سے اپنی پارٹی اور ساتھیوں کی جانب سے ان کی جماعت کے ساتھ اظہار تعزیت کرتا ہوں، ہماری پنجاب ایگزیکٹو کی میٹنگ کے دوران ہمیں ان کی وفات کی اطلاع موصول ہوئی، جس کے باعث ہمیں اپنی میٹنگ موخر کرنا پڑی، محترمہ کلثوم نواز نہایت نفیس خاتون تھیں، بہت بڑھی لکھی اور میاں نواز شریف کی سیاست کے پیچھے ان کا بہت بڑا ساتھ تھا، ان کا سیاست میں 1999میں آنا ہوا تھا، آمریت کے دوران انہوں نے جمہوریت کیلئے آواز بلند کی اور پارٹی کو آگے بڑھایا، انہوں نے جماعت میں بڑی کوششیں کی ہیں۔

عوامی نیشنل پارٹی سندھ کے صدر شاہی سید نے بیگم کلثوم نواز کے انتقال پر گہرے دکھ اور رنج کا اظہا کرتے ہوئے کہا ہے کہ مرحومہ انتہائی نڈر خاتون تھیں،ملک میں جموریت کی بالادستی کے لیے بیگم کلثوم نواز کی جدوجہد ناقابل فراموش ہیں ۔ انہوں نے کہا دکھ اور غم کی اس گھڑی تمام لواحقین سے گہری ہمدردی کا اظہار کرتا ہوں،دعا گو ہوں کہ اللہ تعالی مرحومہ کو اپنے جوار رحمت میں جگہ عطا فرمائے۔

Print Friendly, PDF & Email
حصہ