عدالت عظمیٰ،کراچی میں نئی مردم شماری،حلقہ بندیوں کی درخواست سماعت کے لیے منظور

117

اسلام آباد (صباح نیوز) عدالت عظمیٰ نے کراچی میں نئی مردم شماری اور حلقہ بندیاں کرانے کی درخواست سماعت کے لیے منظور کرلی۔ چیف جسٹس میاں ثاقب نثار نے پاک سرزمین پارٹی کے سربراہ مصطفی کمال کی درخواست کی ان چیمبر سماعت کی۔ چیف جسٹس نے رجسٹرار آفس کے اعتراضات مسترد کرتے ہوئے درخواست کو تعطیلات کے بعد سماعت کے لیے مقرر کرنے کا حکم دے دیا۔مصطفی کمال نے کراچی میں ہونے والی حالیہ مردم شماری کے نتائج کو عدالت عظمیٰ میں چیلنج کرتے ہوئے نئے سرے سے حلقہ بندیاں اور مردم شماری کرانے کی درخواست دائر کی ہے۔ عدالت عظمیٰ کے رجسٹرار نے مصطفی کمال کی
درخواست پر اعتراضات عائد کیے تھے اور مصطفی کمال نے رجسٹرار کے اعتراضات کیخلاف اپیل دائر کی تھی۔ عدالت عظمیٰ کے باہر میڈیا سے گفتگو کرتے ہوئے مصطفی کمال نے کہا کہ پورے ملک میں سب سے زیادہ آبادی کراچی میں بڑھی ہے۔ چیف جسٹس نے نئی حلقہ بندی اور مردم شماری سے متعلق ہماری درخواست منظور کرلی ہے جس کی اب کھلی عدالت میں سماعت ہوگی۔

Print Friendly, PDF & Email
حصہ