سینیٹ الیکشن، (ن) لیگ کے حمایت یافتہ 16 اور پی پی پی کے 11 امیدوار کامیاب

321

سینیٹ الیکشن میں غیر سرکاری و غیر حتمی نتائج کے مطابق پنجاب اور اسلام آباد میں (ن) لیگ کے حمایت یافتہ امیدوار کامیاب ہوگئے، جب کہ سندھ میں پیپلز پارٹی کے امیدواروں نے میدان مار لیا اور ایم کیو ایم کو بدترین شکست کا سامنا کرنا پڑا۔

سینیٹ کی 52 نشستوں پر 113 امیدواروں کے درمیان مقابلہ ہوا۔ کامیاب امیدوار 6 سال کے لیے ملک کے ایوان بالا سینیٹ کے رکن منتخب ہوجائیں گے۔ قومی اسمبلی اور ملک کی چاروں صوبائی اسمبلیوں میں صبح 9 بجے پولنگ شروع ہوئی جو شام 4 بجے تک بلا تاخیر جاری رہی۔
سینیٹ الیکشن کے غیر سرکاری و غیر حتمی نتائج

اب تک کے نتائج کے مطابق مسلم لیگ (ن) کے حمایت یافتہ 16 امیدوار، پیپلز پارٹی کے 11 امیدوار، پی ٹی آئی کے 4 اور 10 آزاد امیدوار کامیاب ہوگئے۔

پنجاب
پنجاب سے سینیٹ کی 12 میں سے 11 نشستوں پر مسلم لیگ ن کے حمایت یافتہ آزاد امیدوار کامیاب ہوگئے جبکہ صرف ایک سیٹ تحریک انصاف کو ملی۔ جنرل نشست پر مسلم لیگ ن کے حمایت یافتہ ڈاکٹر آصف کرمانی، رانا مقبول احمد، زبیر گل، شاہین خالد بٹ ، مصدق ملک اور ہارون اختر کو فتح حاصل ہوئی۔ ٹیکنو کریٹ سیٹ پر سابق وزیر خزانہ اسحاق ڈار اور حافظ عبدالکریم کامیاب ہوگئے۔ اقلیت کی ایک نشست پر کامران مائیکل جبکہ خواتین کی دونوں نشستوں پر سعدیہ عباسی اور نزہت صادق کامیاب ہوئیں۔

پی ٹی آئی کے چوہدری سرور ایک جنرل سیٹ جیتنے میں کامیاب ہوگئے۔ الیکشن جیتنے کے بعد میڈیا سے گفتگو کرتے ہوئے چودھری سرور نے سپورٹ کرنے پر جماعت اسلامی، آزاد اور پی ٹی آئی ارکان کا شکریہ ادا کیا۔

اسلام آباد
اسلام آباد کی دونوں نشستوں پر مسلم لیگ (ن) کے حمایت یافتہ امیدوار کامیاب ہوگئے۔ جنرل نشست پر اسد جونیجو اور ٹیکنوکریٹ پر مشاہد حسین سید سینیٹر منتخب ہوگئے۔

سندھ
غیر حتمی غیر سرکاری نتائج کے مطابق ایم کیوایم سندھ میں ایک سیٹ حاصل کرنے میں کامیاب ہو گئی ہے، ایم کیو ایم پاکستان کے فروغ نسیم جنرل نشست پر کامیاب قرار پائے ہیں۔سندھ سے موصول ہومنے والے نتائج کے مطابق سندھ کی 12 میں سے 11 نشستوں پر پیپلزپارٹی کامیاب قرار پائی۔ ایک نشست پر فنکشنل لیگ کے مظفر شاہ کامیاب ٹھہرے ہیں۔غیر سرکاری نتائج کے مطابق مولابخش چانڈیو، رضا ربانی، مصطفیٰ نوازکھوکھر کامیاب اپنے نام کر چکے ہیں۔ پیپلزپارٹی کے انورلعل ڈین اقلیتی نشست پر فاتح ٹھہرے۔ خواتین نشست پرپیپلزپارٹی کی کرشنا کوہلی اور عینی مری کامیاب ٹھہریں۔ ٹیکنوکریٹ نشست پرسکندر میندھرو اور رخسانہ زبیری کامیاب قرار پائے۔

ٹیکنوکریٹ کی نشست پر پیپلز پارٹی کے سکندر میندھرو اور رخسانہ زبیری سینیٹر منتخب ہوگئے۔ اقلیتی نشست پر پیپلز پارٹی کے انور لال ڈین جبکہ خواتین کی مخصوص نشست پر پی پی پی کی ہی کرشنا کوہلی اور قرٓ العین مری الیکشن جیت گئیں۔

بلوچستان
بلوچستان کی 7 جنرل نشستوں میں سے 5 پر آزاد امیدوار جبکہ دو پر سیاسی جماعتوں کے امیدوار کامیاب ہوگئے۔ جنرل نشستوں پر آزاد امیدوار احمد خان، صادق سنجرانی، انوارالحق کاکڑ، کہدہ بابر، پشتونخواہ میپ کے حمایت یافتہ آزاد امیدوار یوسف کاکڑ جبکہ جمعیت علمائے اسلام (ف) کے مولوی فیض محمد اور نیشنل پارٹی کے محمد اکرم سینیٹر منتخب ہوگئے۔

ٹیکنوکریٹس کی 2 نشستوں میں سے ایک پر نیشنل پارٹی کے طاہر بزنجو اور دوسری پر ن لیگ کے حمایت یافتہ نصیب اللہ بازئی کامیاب ہوگئے۔ خواتین کی نشستوں پر پشتونخوا میپ کی عابدہ عظیم اور آزاد امیدوار ثنا جمالی کامیاب ہوئیں۔

خیبرپختون خوا
خیبرپختونخوا میں جنرل نشستوں پر پی ٹی آئی کے فیصل جاوید، ن لیگ کے حمایت یافتہ امیدوار پیر صابر شاہ اور جے یو آئی ف کے طلحہ محمود کامیاب ہوگئے۔ ٹیکنوکریٹ کی نشستوں پر پی ٹی آئی کے اعظم سواتی اور ن لیگ کے حمایت یافتہ دلاور خان کامیاب ہوگئے۔

خواتین کی نشستوں پر پاکستان تحریک انصاف کی مہرتاج روغانی اور پیپلزپارٹی کی روبینہ خالد کامیاب ہوگئیں۔ خیبر پختون خوا میں جے یو آئی (س) کے مرکزی امیر مولانا سمیع الحق ٹیکنوکریٹ کی نشست پر ہار گئے۔ انہیں صرف 4 ووٹ ملے۔

فاٹا
فاٹا کی چاروں نشستوں کا نتیجہ آگیا اور امیدواروں کی کامیابی کا اعلان کردیا گیا جن میں ہدایت اللہ ،ہلال الرحمن، شمیم آفریدی اور مرزا محمد آفریدی شامل ہیں۔ چاروں امیدوار آزاد حیثیت میں کامیاب ہوئے اور انہوں نے سات سات ووٹ حاصل کئے۔

ابتدائی اطلاعات کے مطابق قومی اسمبلی میں 294 ووٹ کاسٹ کیے گئے۔ ن لیگ کے 227 ارکان اور ایم کیو ایم کے 11 ارکان نے ووٹ ڈالے۔ قومی اسمبلی میں فاٹا کے 8 ارکان نے ووٹ کاسٹ کیا جبکہ 3 ارکان نے ووٹ کاسٹ نہیں کیا جن میں غالب خان، قیصر جمال اور شہاب الدین شامل ہیں۔

اسلام آباد کی 2 نشستوں کیلیے 250 ووٹ کاسٹ ہوئے۔ بلوچستان اسمبلی میں تمام 64 ارکان نے ووٹ کاسٹ کیے۔ پنجاب اسمبلی کے 368 ارکان نے ووٹ کاسٹ کیے۔ سندھ اسمبلی میں 161 ووٹ ڈالے گئے۔ خیبرپختون خوا اسمبلی میں 122 ارکان اسمبلی نے حق رائے دہی استعمال کیا۔ آخری ووٹ جماعت اسلامی کے محمد علی نے کاسٹ کیا۔

سینیٹ انتخابات میں چاروں صوبوں کی 7، 7 جنرل نشستوں پر امیدواروں کا انتخاب کیا گیا۔ ہر صوبے سے خواتین اور ٹیکنوکریٹس کی 2، 2 نشستوں پر امیدواروں کا چناؤ ہوا۔ سینیٹ میں اقلیتوں کی 2، فاٹا کی 4 اور اسلام آباد کی 2 نشستوں کے لئے بھی مختلف جماعتوں کے امیدوار آمنے سامنے تھے۔ اسلام آباد کی ایک نشست جنرل اور دوسری ٹیکنوکریٹ پر خفیہ رائے شماری ہوئی۔

Print Friendly, PDF & Email