عالمی اُردو مرکز کی ’ مجلسِ اقبال‘ کے تحت شاندار تقریب

79

جدہ: سعودی عرب میں عالمی اُردو مرکز علمی ،ادبی اور قومی حوالوں کا ایک ایسا ہمہ جہت ادارہ ہے جو نہ صرف وطنِ عزیز پاکستان اور پاکستانیت کے فروغ کے بھرپور جذبوں کے ساتھ اُردو زبان و ادب کی خدمت و ترویج میں اہم کردار ادا کر رہا ہے بلکہ بانی پاکستان قائد اعظم محمد علی جناح اور مفکرِ پاکستان علامہ اقبال کے افکارو نظریات کو بھی اپنی معیاری اور بامقصد تقریبات کے انعقاد کے ذریعے بھرپور انداز سے اُجاگر کر رہا ہے ۔
گزشتہ دنوں عالمی اُردو مرکز کے ذیلی ادارے ’ مجلسِ اقبال‘ کے تحت ایک یادگارتقریب ’مجلس اقبال‘ کے چیئرمین عامر خورشید رضوی کی سرپرستی میں منعقد کی گئی۔ عالمی اُردو مرکز جدہ کے صدر اطہر نفیس عباسی نے مہمانوں کا استقبال کیا۔ تقریب کی صدارت پاکستان قونصلیٹ جدہ کے پریس قونصل ارشد منیر نے کی جبکہ نظامت کے فرائض عالمی اُردو مرکز کے جنرل سیکرٹری حامد اسلام خان نے ادا کیے۔ تلاوتِ کلام پاک اور ترجمہ قاری محمد آصف نے پیش کیا۔ ہدیہ نعت بحضور سرورِ کونین ﷺ نوجوان نعت خواں احمد بن زبیر نے پیش کیا۔ حامد اسلام خان نے شرکا تقریب کو خوش آمدیدکہتے ہوئے کہا کہ گزشتہ کئی برسوں سے باقاعدگی کے ساتھ مجلسِ اقبال کی تقریبات کے انعقاد کا سلسلہ جاری ہے اور اس کامیابی میں جدہ کے اردو ادب سے لگائو رکھنے والے اہلِ ذوق اور علامہ اقبال سے عقیدت رکھنے والے احباب بھی ہمیشہ شامل رہے ہیں۔
نوجوان دانشور سیّد جنید نے کلامِ اقبال ’جاوید کے نام‘ تحت اللفظ میں پیش کیا۔ معروف شاعرو ادیب ڈاکٹر محمد سعید کریم بیبانی نے مجلسِ اقبال اور عالمی اردو مرکز کی خدمات کو سراہتے ہوئے دلی مبارکباد اور تہنیت پیش کی اور اپناکلیدی مقالہ ’ کلامِ اقبال کی بہترین تشبیہات‘ کے عنوان سے پیش کرتے ہوئے سورۃ رحمٰن کی آیاتِ مبارکہ اور اُن کا ترجمہ ’ رحمٰن نے قرآن سکھایا اور انسان کو پیدا کیا اور اسے بیان یا بات کرنا سکھایا‘ پیش کیا ۔
پاکستان قونصلیٹ جدہ کے پریس قونصل ارشد منیر نے اس موقع پر کہا کہ مجلسِ اقبال کو ایسی علمی و ادبی تقریب منعقد کرنے پر مبارکباد پیش کرتا ہوں جن کی مشترکہ کاوشوں کی بدولت جدہ سعودی عرب میں گزشتہ کئی برسوں سے ہر ماہ باقاعدگی سے علامہ اقبال اور ان کے کلام کا ذکر ہوتا ہے اور اُردو زبان کی ترویج بھی ہوتی ہے۔
عالمی اُردو مرکز جدہ کے صدر اطہر نفیس عباسی نے اظہارِ تشکر کے بعد اپنے خطاب میں کہا کہ ہماری خوش نصیبی ہے کہ ہمیں پاکستان قونصلیٹ جدہ کی مکمل سرپرستی اور تعاون حاصل ہے۔مجلسِ اقبال کے چیئرمین معروف دانشور عامر خورشید رضوی نے کہا کہ اظہارِ تشکر مجھ پر واجب ہے اور یہ ایک خوشگوار فریضہ ہے۔ اُنہوں نے ارشد منیر، ڈاکٹر سعید بیبانی اور سید جنید کے خطابات کو سراہا۔

Print Friendly, PDF & Email
حصہ