وزیراعلیٰ پنجاب کی اسپتال میں جاں بحق زہرا بی بی کے گھر آمد

157

وزیراعلیٰ شہبازشریف جناح اسپتال میں جاں بحق ہونے والی خاتون زہرابی بی کے گھرٹبی کمبواں قصور پہنچ گئے۔ وزیراعلیٰ پنجاب نے لواحقین کو 10 لاکھ روپے مالی امداد کا چیک دیا۔

وزیراعلیٰ پنجاب محمد شہبازشریف جناح اسپتال میں علاج معالجے کی مناسب سہولتیں نہ ملنے کے باعث چند روز قبل جاں بحق ہونیوالی 60سالہ خاتون زہرا بی بی کے گھر ٹبی کمبواں قصور گئے۔ وزیراعلیٰ نے جاں بحق خاتون کے غمزدہ بیٹوں ، بیٹی اور دیگر لواحقین سے دلی ہمدردی اور تعزیت کا اظہار کیا اور ہسپتال میں مناسب علاج معالجہ نہ ملنے کے باعث مریضہ زہرا بی بی کے جاں بحق ہونے کے واقعہ پر گہرے دکھ اور افسوس کا اظہارکیا۔

وزیراعلیٰ نے جاں بحق ہونے والی خاتون زہرا بی بی کے ایصال ثواب کیلئے فاتحہ خوانی کی اورجاں بحق خاتون کے بیٹوں،بیٹی اوردیگر لواحقین کو دلاسہ دیا۔ وزیراعلیٰ شہبازشریف نے زہر ابی بی کے بیٹوں اوردیگر لواحقین سے گفتگو کرتے ہوئے کہا کہ مجھے اس افسوسنا ک واقعہ پر جو دکھ اوررنج ہوا ہے، وہ میں الفاظ میں بیان نہیں کرسکتا۔ آپ کا جرم اس کے سوا کچھ نہیں کہ آپ غریب ہیں۔آپ کی والدہ کے علاج معالجے میں بے حسی کا مظاہر ہ کرنے والے ڈاکٹر مسیحا کہلانے کے حقدار نہیں ۔

وزیراعلیٰ نے کہا کہ میں آپ کی والدہ تو واپس نہیں لاسکتا لیکن پنجاب حکومت آپ کے خاندان کی ہر ممکن دیکھ بھال کرے گی۔ وزیراعلیٰ نے جاں بحق مریضہ کے لواحقین کو 10لاکھ روپے مالی امداد کا چیک دیا۔

دریں اثناء وزیراعلیٰ نے ایک خاتون شبانہ کی درخواست پر ڈی پی او قصور کو ہدایت کی کہ خاتون کے مقتول بیٹے کے کیس کی تحقیقات جلد مکمل کی جائیں اورملزمان کو گرفتار کر کے انصاف کے تقاضے پورے کیے جائیں ۔وزیراعلیٰ نے اس خاتون کیلئے 5لاکھ روپے مالی امداد کا اعلان کیا اور کہا کہ آپ کو انصاف ملے گا اور آپ کے اکلوتے بیٹے کو قتل کرنے والے ملزم جلد گرفتار ہوںگے۔

Print Friendly, PDF & Email
حصہ